Շիշլի մարզակումբի ֆութսալի խումբը մեկնած է Մենչըսթըր, Անգլիա։ Ֆութսալի ախոյեաններու լիկի նախաորակաւորման փուլի հանդիպումներուն կը մասնակցին շիշլիցիները։ ՈՒԷՖԱ-ի այս կարեւոր մրցաշարքին Շիշլի արդէն երկրորդ անգամ կը մասնակցի՝ անընդմէջ երկու տարի Թուրքիոյ ախոյեանի տիտղոսը նուաճած ըլլալով։
Ամրան շրջանին Պատրիարքական Աթոռի հովանաւորութեամբ կազմակերպուած «Մենք երգ ենք» համերգաշարը երէկ երեկոյեան շարունակուեցաւ Մեծ կղզիի մէջ։ Գնալը կղզիի մէջ տեղի ունեցած ձեռնարկներէն վերջ, ծրագրի հերթական փուլը կեանքի կոչուեցաւ Մեծ կղզիի Ս. Աստուածածին հայ կաթողիկէ եկեղեցւոյ երդիքին տակ, ինչ որ մեծ խանդավառութիւն առթեց տեղւոյն հայութեան:
Համայնքային շրջանակները շաբաթավերջին ոգեկոչեցին բարեյիշատակ Նշան Եաղուպեանը՝ մահուան երկրորդ տարելիցին առթիւ։ Նշան Եաղուպեան, որ երկու տարի առաջ մահացած էր, ճարտարապետութեան բնագաւառին մէջ դարձած էր կենդանի առասպել մը, նաեւ իր կարեւոր նպաստը բերած՝ թրքահայ զանազան հաստատութիւններու։
Երէկ, Պաքըրգիւղի Ծն. Ս. Աստուածածին եկեղեցւոյ մէջ Վերափոխման տաղաւարին առթիւ ստեղծուեցաւ շատ խանդավառ մթնոլորտ։ Տօնակատարութիւններուն նախագահեց, տաղաւարի Ս. Պատարագը մատոյց եւ օրուան պատգամը տուաւ Տ. Արամ Արք. Աթէշեան, որ հաւատացեալներուն առատօրէն բաշխեց իր օրհնութիւնը։
Գնալըի բարձունքին Ս. Աստուածածնի վերափոխման տաղաւարը այս տարի եւս հոգեւոր ցնծութեան առիթ դարձաւ։ Ս. Գրիգոր Լուսաւորիչ եկեղեցւոյ մէջ երէկուան տօնակատարութիւններուն հանդիսապետեց Տ. Յարութիւն Վրդ. Տամատեան՝ մինչ հոծ թիւով հաւատացեալներ համախմբուեցան օրուան խորհուրդին շուրջ։
Գուրուչէշմէի Երեւման Ս. Խաչ եկեղեցւոյ մէջ երէկ մեծ խանդավառութեամբ նշուեցաւ Ս. Աստուածածնի տօնը։ Վերափոխման տաղաւարի նախօրէին՝ Վոսփորի Եւրոպական ափի այս գողտրիկ սրբավայրը օծուած եւ պաշտամունքի վերաբացուած էր՝ բարեզարդման աշխատանքներէ վերջ։
Թրքահայ ազգային-եկեղեցական կեանքէն ներս այս տարուան Ս. Աստուածածնի վերափոխման տաղաւարը կը բնորոշուի Վաքըֆլըգիւղի համանուն եկեղեցւոյ օծման ու պաշտամունքի վերաբացման արարողութիւնով։
Պոլսահայ վարժարաններէն ներս կրօնի առարկայի դասաւանդման ուղղեալ նոր նախաձեռնութիւն մը:
Ամենապատիւ Սրբազան Պատրիարք Հօր գլխաւորութեամբ, Գումգաբուի մէջ համայնքային վարիչներու հետ խորհրդակցութիւն:
Թուրքիոյ ոչ-իսլամ փոքրամասնական համայնքներու արդի տարեգրութեանց մէջ, զօրակցութեան տեսակէտէ այս ամառ բացառիկ դրսեւորում մը հանդիսացաւ Գնալըի բարձունքին պարզուած ողջունելի դրուագը։
Երէկ, Գումգաբուի Ս. Աստուածածին Աթոռանիստ Մայր եկեղեցւոյ մէջ տեղի ունեցաւ նորոգ հանգուցեալ տոց. տքթ. Վահէ Ալիքսանեանի յուղարկաւորութեան արարողութիւնը, որ համախմբեց համայնքային շրջանակներէն բազում դէմքեր՝ մասնաւորապէս Սուրբ Փրկիչ Ազգային հիւանդանոցէն պատասխանատուներ։
